寄予未來的一張批

寄予未來的一張批

我有一个厝邊阿明，伊是一个真善良的人。伊捌共我講一个故事，使我著驚，毋久煞毋是因為內容：這款代誌，佇彼个時代應該定定發生；使我著驚的理由，是這故事的終局，予我有磕著阿明的過去......
彼一工，雨滴澹規日，毋久厝邊隔壁、親情等，猶原是毋管敢有收著帖仔無，攏總緊來去赴婚宴。因為請人客的是地方有頭有面的大人物，毋但財產濟但定，一百冬來這个家族佇遮做逐款好事；而且上重要的：若成功鑽入宴席，怹嘛一定會共你請，嘛免煩惱行出會堂會予人蓋布袋。既然人遐呢好，逐家就無客氣矣，入來的人客互相爭論家己毋知有影無影的偉大，逐个攏想欲坐大位。
彼時，外省人的軍官沓沓行入會堂，四周看覓咧，眾人忽然毋敢出聲，一直到伊揀好坐位，眾人才繼續。自從中國人統治台灣以後，真濟無需要講出喙，毋知影煞閣袂使的規例變出來，親像這就是一个：「抗戰英雄」若來，參加的人客肯定攏愛讓位予伊。當然，遮講的英雄是做官的，若是一般，猶是特別散赤的外省兵丁，會親像彼一个，伊咧佮在地人相爭無愛坐第二微細的位，加添婚宴的喜氣。不過婚禮一開始以後，眾人煞攏發覺代誌大條矣；毋久攏恬恬，因為怹毋知欲按怎處理。
一个老大人真礙虐徛佇邊仔，原來伊是新郎的阿爸；因為外省軍官，坐的竟然是攢予伊的位。然後怹互相笑笑，新郎的阿爸現在才了解，原來軍官毋是毋知影，煞是刁工佇眾人面前予伊洩面子。毋久伊嘛袂當按怎，只好頭犁犁，目睭四界踅敢閣有空位無。彼時，坐上微細彼位的人雄雄徛起來，行到眾人的面頭前，對怹演講：
「恁予人請去赴婚宴的時，毋通坐大位，驚了有比你較尊貴的人客嘛來予伊請。彼時，請伊佮你彼个主人會來共你講：『請讓位予這个人客。』彼陣，你會感覺真歹勢，煞著去坐上細的位。你予人請的時，寧可去坐上細的位。按呢，請你的主人會來共你講：『朋友，請來坐大位。』彼陣，你佇仝桌的人客面前就有體面。因為提高家己的，會受降低；毋久家己屈低的，會受提高。
我實實在在共恁講：恁愛坐大位的人慘矣！你掌權，你位懸，對你來講享受榮光是一个寬闊好過的門，順利好行的路；不過彼條路透到滅亡。我閣共恁講：著對彼个狹的門入去，佇天頂會有大位攢予恁。」
講煞，彼个人行倚去老大人身邊，共老大人牽來會堂唯一賰的空位：就是拄才伊家己坐的位。然後伊攑杯佮新郎新娘敬兩杯酒，就無欲插彼个軍官，隨時行出婚禮會堂。
過無三年，伊消失矣，伊厝內到今亦無接著伊的消息。伊本族的人攏想講，雖然伊是一个溫柔和氣的人，毋久性格條直閣愛替人出頭，活甲三十偌歲嘛有夠矣。佇這款的世界。伊親像是早知影家己會無好死，生甲真緣投煞直直無欲娶某生囝，因為「佇遮个日子，有身孕的佮予嬰仔食奶的婦仁人，非常不幸」。原本伊應該嘛會親像大部份的人，沓沓仔就按呢對世間人的追念中消失。不過，聽講伊予關監了後，煞無失志，不時看顧監的人行過，其他犯人歡喜猶是鬱卒，逐款時陣攏總欲佮逐个人揣話講。其中有一个上定佮伊開講，佮伊特別好的同監，彼个同監後來講：佇彼个人予處死的彼一工，伊咧欲予導去行最後一段路途的時陣，我，有聽見一个聲音對伊講：
「你是我所疼的囝，
你，我真意愛。」
彼个同監就是阿明，伊毋但記得這个聲但定，閣有真濟其他怹捌講過的故事，怹過去捌拄著啥物、有怎樣的人生，相爭這世間的未來，敢真正咧欲有性命的光照咧抑是無；毋久，咱現在的重點是宴席。若欲將一个人的所有代誌一項項攏總記錄，所寫的冊全世界嘛貯袂了。阿明出監了後，四界宣揚伊捌佇無其他人的監牢內，聽過的一个聲對一个欲導去槍殺的人講話，毋久當然無偌濟人信。只有真少認捌阿明的人，知影伊現在是一个偌仔呢純全可靠的人，才對按呢來相信。我咧，我嘛干焦相信淡泊仔但定，也咧疑也咧信。毋久佇世間人的中間，我已經算是相信到袂顧得矣；所以，才會寫落這篇干證，通予阿明完成伊的心願。對我心內所相信的彼爿，我向望，我做這件代誌嘛通算做功勞，予阿明捌聽過的彼个聲，向耳空聽咱祈禱：
「願你的旨意實現，佇地上，親像佇天頂。」
抑是講，咱應當成做囡仔，閣較簡單的，按呢講：
「願世界和平。」 

註：除了電腦毋支援、拍袂出來的字，[in1]寫做「怹」，[tshua7]寫做「導」，其他遵趁教育部台語用字寫成。