軟弱另外一頭的光

軟弱另外一頭的光

1.
矣矣，彼對閣交往矣。遐濟人密切注意的這段感情，親像天地佇挪亞方舟的保護下，歷史達到圓滿。猶毋久我猶是孤單一人。
毋......毋是噢？我，我毋是咧怨妒抑是怨嘆噢？總講一句，我嘛佮逐家仝款真心好意咧共怹祝福。想看覓彼當陣怹猶久吵甲不可開交，現在按呢盡在好。雖然我猶是孤單一个，唉......「無名同學？」有人磕咧我的肩胛頭，我誠奇怪啥人會插我，隨時越頭轉來。我看見伊，疼，疼就是重得幸福的彼人。伊的長頭毛佇日頭下閃現金光。彼時，一首詩歌對我心內響起：
你的傷猶久佇咧，
不過你用受害者的身份，已經有赦免犯人一切的罪，
因為你是遐呢謙遜善良，這个善良是你的光。
所以，你才通做伙進前行，
牽起同伴的手，向望得醫好彼工。
我才咧思考的彼个查某囡仔雄雄出現予我掣一下，「請問有啥物代誌？」，我拚性命假出一个冷靜的表情。疼講：「老師頂禮拜上課捌講過一个寫生作業，這是你彼份材料。」啥矣，干焦是按呢......毋是噢，我真正無失望。閣較媠嘛是別人的女朋友，我哪可能動啥歪腦筋，哈哈，唉......
2.
我出去揣彼个溪，彼个予我平靜，我感覺屬佇我的所在。毋久就算我到遮，我嘛無法度畫落來、保存這片美麗的景緻。這需要才能，需要特色，需要堅持佮拍拚，需要不斷精進的慾望，不過我一項都無。「每一个人，性命內攏有彼箍屬佇伊的金幣，」我擋袂牢唸出捌讀過的台詞，
「彼就是講，我毋是人嘛？」
彼个時陣，我看見阮班內第二媠个美人（至少佇我看起來），痛，已經佇遮矣（順紲講一句，第一名是疼）。伊細力擲石頭落溪內，注目咧水面，我感覺我親像行入佗一个畫的世界仝款。
伊講：「我伸手，轉來我捌有的故鄉。我想對起頭開始踏出去，閣一擺試看，彼種關係，互相涉入別人的性命內的干涉。我捌佇遮予反背，我向望做伙活咧的人，伸手共我捒開。罪過共阮兩人的過去縛咧，我毋是毋願赦免，只是驚惶：我干焦賰這个矣，我佇世間人中最後的干涉：我已經無厝內人，同伴，朋友矣，若無這款否定性的關係，我只是所有人的過路人。若無犯罪佮被害的關係，我會予所有人放袂記。」
我聽了伊講的遮个話，加添進前淡薄仔淡薄仔聽過的消息，感覺所有鬥片攏聚全矣。我現在已經知影痛捌一擺受反背，被無辜定罪，對故鄉，阮捌有的規个世界予趕出去；不過：伊現在轉來矣。雖然我根本毋認捌伊，毋久我臆：痛，一定是......（是講按呢佇心內偷喝美少女的名敢是予人起毛真䆀......）我想，我現在有應該對伊講个話。
我應答伊講：「去賣你一切的財產；若是故鄉，感情，干涉，任何窒礙你去追揣幸福的，著放捒一切，這一定毋是重新開始，因為咱攏有仝一个心意：無論咱敢有感受著無，咱已經有互相涉入別人的性命內。伊毋是你獨一的一个；親像你嘛毋是伊獨一的一个：就算你現在對伊也咧疼也咧恨，也咧仁愛也咧敵對。著赦免：你毋需要執守伊，親像伊毋需要執守你，著袂記後面，追逐頭前。恁捌有的積聚袂對按呢無去，恁貴重的追念對按呢反轉愈堅固。你赦免伊，你㧒落伊，對按呢你會有百倍的氣力去疼，去好款待紲落來拄著的真濟人。」
「呃！你是啥人？」痛突然發覺了我的存在。「我......，其實我是你的一个同學，毋久你毋認捌我嘛正常。」我講這句話的時感覺心咧滴血。果然，就算定定佮家己講愛接受事實，美少女毋熟似我，彼種「明明仝一班」的感覺猶是無好過。「失禮。」「為啥物你欲共我會失禮，應該是我共你驚著......」「因為明明是仝一个班的，我竟然毋熟似你。誠失禮。」莫按呢，你愈失禮我愈艱苦。過一段時間痛平靜落來以後，雄雄想起拄才我講的話，對我大聲喝：「才毋著。你掠準講你有啥物權威教示人！」
然後提細石頭抌我，「走，你予我走！」彼時我想，明明氣甲提石頭共我擲，煞專工攏抾細的。痛真正足古錐矣，彼个氣怫怫的身姿佇日頭下閃現光耀。
3.
我現在想想，感覺咧欲後悔矣。
若是彼時我討好伊，講一寡別人愛聽的，無定著我已經袂按呢躊躇毋前的活咧，無的確我會揣著伊做我通分享憢疑、烏暗、悲傷的同伴，不過......
果然我袂用得恬咧看爾爾，我相信一定是獻出性命重開始以後，才通得著真正的幸福。我想欲對遮開始我贖罪的第一步。我，是罪人，對按呢天使彼時才會離開我身邊......我無這款想法。我袂會認為刑罰，一定是因為罪過。
我出世時，有看見天使；
彼一工，我失去伊。
自細漢，有一个天使直直陪佇我身邊。伊教示我做逐項應該做的好事，拄著動搖奇怪的時陣，攏總伊會用歌聲引導我；聽趁伊的話，我毋捌受過傷，總是得著好處。我一直掠準講這款安心直直會繼續落去。煞有一工，天使離開矣。我是罪人，所以受著處罰......袂會是按呢。不過對彼時開始，我直直在佇仝一个所在著觸：我毋知前頭會按怎，我毋敢行倚前矣。所以我藏佇角頭，用嫉妒佮誹謗的眼神看每一个幸福的人：我其實攏知影怹嘛是擔過不安，佇驚惶的重壓下行到今仔日。我煞直直覕佇角頭。我，是一个罪人，毋是因為我毋去做好事無幫贊人，卻是因為我行袂出家己的世界，我用好報賞共家己的世界圍起來，無氣力無忍耐真正去面對別人。
彼時，我看著彼个囡仔，閣來到這个溪水邊。痛閣來到這个溪水邊。面容親像大受氣款咧紅記記，頭犁犁，一步一步重重踏咧向遮行來。我哪想著伊嘛遮佮意這溪水，會佇遮閣拄著。我猶未想過拄著伊我應該講啥。痛就按呢停咧佇一跤步通伐過的對岸，注目看我。佇我無細膩予伊眼神中的能力吸引去時，聽見伊有對我大聲喝：
「請你佮我，
成做朋友好無？」



註：除了電腦毋支援、拍袂出來的字，[in1]寫做「怹」，[tshua7]寫做「導」，其它攏遵趁教育部台語用字寫成。（除非寫毋著......）