何西亞書14章（翻譯）

何西亞書14章
對「現代中文譯本」以及「巴克禮譯本」翻譯，遵趁教育部台語漢字書寫。

1.以色列矣，你因為你的罪跋倒；你著倒轉來歸佇上主，你的上帝。
2.您著愛倒轉來上主遮，對伊講：「求你赦免阮攏總的罪，因為你的恩典來接納阮。阮就用喙唇頌讚你，來代替獻牛犅行禮。
3.亞述人無法度共阮救；阮嘛無法度靠馬來得著安全。阮永遠袂閣對偶像講：『你是阮的上帝。』上主矣，阮知影你會對孤兒施恩。」
4.上主講：
我的子民因為背叛受傷，我欲醫好怹，
專心一意疼惜怹；
我無愛閣對怹發性。
5.以色列若焦燥，我是露水。
我欲予怹親像百合花開花，
親像利巴嫩的大樹伸根到地下。
6.怹欲出新枝，
親像橄欖樹仝款嫷；
怹欲衝出（tsheng3-tshut4）芳味，
親像利巴嫩的香柏樹。
7.我會閣一遍保護怹。
怹欲親像翻青的五穀，
親像開花的葡萄園。
怹欲親像利巴嫩的好酒。
8.以色列人欲佮偶像斷絕關聯；
我欲共怹應答，閣欲照顧怹。
我欲親像青翠的松樹共怹致蔭；
我欲做怹一切福氣的源頭。
9. 希望聰明的人、有智慧的人攏有了解這本冊的內容；希望怹囥佇心內。上主的路途正直；義人的跤步安穩，罪人卻因為看輕這个路，致到跋倒。