希望在飄

希望在飄 


親像冬天的日頭，
你把光帶進來，帶到我這；
我這獨獨有冷冰冰的塗，
獨獨有枯萎的種和拋荒的地。

但是你已經離開，
我倒去自己的黑暗中；
但是你已經離開，
已經開你的翼飛去。

我的盼望續親像雲，
向自己不知道的所在飄過去。 



Pe̍h-ōe-jī pán:
Hi-bāng teh phiau


Chhin-chhiūⁿ tang-thiⁿ ê ji̍t-thâu,
Lí kā kng chhōa--ji̍p-lâi, chhōa kàu góa chia;
Góa chia kan-ta ū léng-peng-peng ê thô͘,
Kan-ta ū ko͘-tâ ê chéng kap pha-hng ê tōe.

Tān-sī lí í-keng lī-khui,
Góa tò-khì ka-kī ê o͘-àm-tiong;
Tān-sī lí í-keng lī-khui,
Í-keng khui lí ê si̍t pe--khì.

Góa ê ǹg-bāng sòa chhin-chhiūⁿ hûn,
Ǹg ka-kī m̄ chai-iáⁿ ê só͘-chāi phiau--kè-khì.




台語漢字版：
希望咧飄

 
親像冬天的日頭，
你共光導-入來，導到我遮；
我遮干焦有冷冰冰的塗，
干焦有枯憔的種佮拋荒的地。

但是你已經離開，
我倒去家己的烏暗中；
但是你已經離開，
已經開你的翼飛-去。

我的向望紲親像雲，
向家己毋知影的所在飄-過去。

解老（一）

我親愛所疼的朋友，你為什麼憂悶，為什麼著急不安？豈不是你聽著，卻沒入耳？你看著，卻沒看見嗎？你思想看覓一個種子落塗，豈不是那個塗肉軟，那個土地好，才可以結實嗎？若這樣是什麼話窒礙著你？一朵花水澆太多豈會開嗎？或是沒曬著太陽光就會自己生長嗎？一朵也不會！所以都是照他們自然的本性；一屑仔沒能加，淡薄仔不能把少。這世間的一切豈不是都是這樣嗎？
萬物是種子，道是那個好的土地。塗若硬，土地就沒好，種子就不會發芽；道也是這樣。道是「無為」，他讓萬物照他們自己的本性生長，這就是道的「有性」；也因為這樣萬項事都是靠無為來成功，來完成的，所以「無為」這個概念沒被包括在「萬項事」裡貯，這就是道的「無性」。



Pe̍h-ōe-jī pán: Góa chhin-ài só͘-thiàⁿ ê pêng-iú, lí ūi sím-mi̍h iu-būn, ūi sím-mi̍h tio̍h-ki̍p put-an? Kiám m̄ sī lí thiaⁿ--tio̍h, soah bô ji̍p hīⁿ? Lí khòaⁿ--tio̍h, soah bô khòaⁿ-kìⁿ mah? Lí su-siúⁿ khòaⁿ-māi chi̍t ê chéng-chí lo̍h thô͘, kiám m̄ sī hit ê thô͘-bah nńg, hit ê thó͘-tōe hó, chiah ōe-tàng kiat-si̍t mah? Nā án-ni sī sím-mi̍h ōe that-gāi tio̍h lí? Chi̍t lúi hoe chúi ak siuⁿ chōe kiám ōe khui mah? Á-sī bô pha̍k--tio̍h ji̍t-thâu kng tō ōe ka-kī seng-tióng mah? Chi̍t lúi mā bōe! Só͘-í lóng sī chiàu in chū-jiân ê pún-sèng; chi̍t-sut-á bô thang ka, tām-po̍h-á m-thang kā chió. Chit sè-kan ê it-chhè kiám m̄ sī lóng sī án-ni mah?
Bān-mi̍h sī chéng-chí, tō sī hit ê hó ê thó͘-tōe. Thô͘ nā tēng, thó͘-tōe tō bô hó, chéng-chí tō bōe puh gê; tō mā sī án-ni. Tō sī ‘bû-ûi’, i hō͘ bān-mi̍h chiàu in ka-kī ê pún-sèng seng-tióng, che tō sī tō ê ‘iú-sèng’; mā in-ūi án-ni bān hāng tāi lóng sī khò bû-ûi lâi sêng-kong, lâi oân-sêng ê, só͘-í ‘bû-ûi’ chit ê khài-liām bô hō͘ pau-koat tī ‘bān hāng tāi’ lāi-tóe, che tō sī tō ê ‘bû-sèng’.



台語漢字版：我親愛所疼的朋友，你為啥物憂悶，為啥物著急不安？敢毋是你聽-著，煞無入耳？你看-著，煞無看見嘛？你思想看覓一个種子落塗，敢毋是彼个塗肉軟，彼个土地好，才會當結實嘛？若按呢是啥物話窒礙-著你？一蕊花水沃傷濟敢會開嘛？抑是無曬-著日頭光就會家己生長嘛？一蕊嘛袂！所以攏是照怹自然的本性；一屑仔無通加，淡薄仔毋通共少。這世間的一切敢毋是攏是按呢嘛？
萬物是種子，道是彼个好的土地。塗若𠕆，土地就無好，種子就袂發芽；道嘛是按呢。道是「無為」，伊予萬物照𪜶家己的本性生長，這就是道的「有性」；嘛因為按呢萬項事攏是靠無為來成功，來完成的，所以「無為」這個概念無予包括佇「萬項事」內貯，這就是道的「無性」。