香絲樹

香絲樹
杜潘芳格


香絲樹，會開花个樹
毋係華麗个花，係開細細个黃金花。

香絲樹，得人惜个細花樹
盡多盡多擺我有想象帶你入來我个心肝肚
毋過你盡像詐無事，毋插我
拿你自家个枝仔影照落池塘裡背
隨風吹去，你个恁可愛个黃金細花。

クラッチ（Kuˇlaˋziˇ）四，スピード（siiˇbido）三十。
堵堵正離開，潮浪趖無个白色燈台
就接近青青个山脈，山上茂盛个香絲樹。

以後，無一定我个子子孫孫，也會分你迷去。
就像今晡日，我恁樣再三、再四，看你樣。

我，也係
出生在島上个
一叢女人樹。


 
Hiongˊxiˊsu
Du panˊ fongˊgiedˋ


Hiongˊxiˊsu , voi koiˊfaˊ ge su
Mˇ he faˇliˇ ge faˊ , he koiˊ sese ge vongˇgimˊfaˊ.

Hiongˊxiˊsu , dedˋ nginˇ xiagˋ ge se faˊsu
Qin doˊ qin doˊ baiˋ ngaiˇ iuˊ xiongˋxiong dai ngiˇ ngibloiˇ ngaiˇ ge ximˊgonˊduˋ
Mˇgo ngiˇ qinqiong za moˇ sii , mˇ cabˋ ngaiˇ
Naˊ ngiˇ ciigaˊ ge giˊeˋiangˋ zeu log ciiˇtongˇ diˊboi
Suiˇ fungˊ coiˊhi , ngiˇ ge anˋ koˋoi ge vongˇgimˊ se faˊ.

Kuˇlaˋziˇ xi , siiˇbido samˊsiib.
Duˋduˋ zang liˇkoiˊ , ceuˇlong soˇ moˇ ge pagsedˋ denˊtoiˇ
Qiu jiabˋkiun qiangˊqiangˊ ge sanˊmagˋ , sanˊsong meusiin ge hiongˊxiˊsu.

Iˊheu , moˇ idˋtin ngaiˇ ge ziiˋziiˋ sunˊsunˊ , ia voi bunˊ ngiˇ miˇhi.
Qiu qiong gimˊbuˊngidˋ , ngaiˇ anˋngiongˇ zai samˊ , zai xi , kon ngiˇ iong.

Ngaiˇ , ia he
Cudˋsangˊ cai doˋsong ge
Idˋ cungˇ ngˋnginˇsu.