十誡

上主十誡——用現代台語譯本作標準新譯

1.我是上主─你的神明；我捌𤆬你對做奴才的家埃及地出來。我以外，你毋通敬拜別个神明。

2.毋通為著家己雕刻偶像；嘛毋通仿做天頂、地上以及地下、水內所有的形像。毋通對彼寡偶像跪拜，因為我是上主─你的神明；我絕對袂容允別个神明佮我敵對。怨恨我的人，我一定會責罰怹佮怹的囝兒 ，直到三四代。不過疼我、遵守我命令的人，我欲用慈愛款待怹，直到千代。

3.毋通糮糝用上主 — 你的神明的名；因為糮糝用上主名的人，上主一定會共伊責罰。

4.著遵守安歇日做聖日。你有六日會當勞苦做你所有的工作；不過第七日是屬上主 — 你的神明的安歇日。這日，無論是你、你的囝兒、奴僕、女婢、精牲、以及蹛佇恁中間的僑民，所有的人攏毋通工作；因為上主佇六日內創造天、地、海、佮其中的萬物；不過第七日伊就歇睏。所以，上主賜福安息日，定這日做聖日。

5.著孝敬父母，按呢做恁就會逐項好勢，佇這个地久長徛起。

6.毋通害死人。

7.毋通姦淫。

8.毋通偷提。

9.毋通作偽證陷害人。

10.毋通貪別人的厝，嘛毋通貪別人的某、奴僕、女婢、牛、驢，以及伊一切所有的。

躊躇

你共阮安貼佇田園中，叫阮著種作阮的世界。

偌仔呢開闊，偌仔呢媠。是你拍開阮的目珠，予阮會當看著干焦看近近是袂見得的一切。毋過，你佇佗位？

我共家己關佇心內，嘛看你袂著；我欲爬（peh4）去天頂，你煞仝款無佇遐。

我想欲共你掠牢，共你隱密佇我寶貴的所在，予我安心。你，是阮性命的意義。

真濟人為著揣求你不時咧思考，真濟人已經共目標認定，好拚性命去拍拚。我疼怹，我看著怹成功嘛仝款鬥歡喜；我有看著，我有感受著怹予我性命的活力。不過煞定定感覺我嘛需要一種物件，予我佇這繼續踅踏落去的每一工，會當有掖落種子的勇氣，會當得著等待收成的向望。

予我力量，共阮的思念細膩藏佇你心中。世界就會成長大漢，一直到伊結實，圓滿。