無題

是喉叫但定，
只不過大聲喊喝；
啥物攏袂留-落來，
親像水-裡的波咧過-去。

你啥事共阮攪擾，
若是水攏會淹過，
江河會變做焦地。
你啥事下希望佇阮的心，
共火石藏佇阮內面。
向望佇心腸內會親像火咧逼，
親像空氣咧欲煏開。

開始

你的光將冰佮雹湠開，
我心內的寒冬過-去。
對暝-時我開始思念你，
你的光彩超越日出的時。

你的身姿離我愈來愈遠，
漸漸我看袂著你的形影。
卻你的跤跡蹛頭前共我捒，
我起身想欲逐-著你的影跡。

著急不安

世界咧搖泏，
阮的心思親像葉仔咧浮沉，
世界親像根釘無深的樹仔。

設想

假使這是你所愛的，
是你所考案的計畫； 
就著用你的手扶持我，
予跤跛的會當行路。

無題

我的活力攏對你來，
你作阮的源泉；
共冬天變做春天，
攪擾細隻鳥仔佮種子。

失智症

伊佇遐恬恬咧坐，
靜靜咧思考；
雖然這是佗位伊已經袂記-得，
嘛袂記-得是對佗位來。