羊椆兮譬喻
「我實實在在給你人講：卜入去羊椆兮人，若無對門入去，對別所在盤入去，伊就是賊仔，就是強盜。
對門入去兮人才是羊兮牧者。
顧門兮給伊開門；羊抑會聽伊兮聲。伊一隻一隻叫伊家己兮羊兮名，取伊人出來。
伊放家己兮羊出來了後，就做羊兮頭前行，羊抑隨伊行，因為羊會認得伊兮聲。
羊毋隨生分人；顛倒會閃避伊，因為毋會認得伊兮聲。」
耶穌給伊人講此個譬喻；但是伊人毋會理解伊所講兮意思。
耶穌是好牧者
所以耶穌就卻給伊人講：「我實實在在給你人講：我就是羊椆兮門。
一切比我較載先來兮人攏是賊仔，是強盜；羊抑毋聽伊人。
我就是門；人若經過我此個門入來兮，會得著救，會隨便出出入入，會取著牧草。
賊仔來，攏是卜來偷掠、殺害、毀滅。我來是卜付伊人得著性命，而且卜付伊人得著充足兮性命。」
「我是好兮牧者、好兮牧者為著羊放捨家己兮性命。
負人倩兮毋是牧者，羊抑毋是伊家己兮，所以一下看見豺狼來，就放捨羊逃走；豺狼就將羊咬去，抑會趕散羊群。
伊按爾逃走是因為伊不過是負人倩兮而而，對羊攏無關心。
我是好兮牧者。牴親像天父別我，我也別天父按爾，我別我兮羊，我兮羊抑別我。又卻我歡喜為著羊放捨我兮性命。
我猶有其他兮羊，毋是屬佇此個羊椆兮。我就愛取伊人來。伊人會聽我兮聲，抑會成做一群，屬諸一個牧者。」
「天父愛我，是因為我願意放捨我兮性命，倘卻得著。
無人會搶我兮性命去，是我家己願意放捨兮。我有權倘放捨性命，抑有權倘卻得著。這是我兮天父命令我做兮。」
因為耶穌講這兮話，猶太人兮中間又卻發生意見衝突。
伊人兮中間有真濟人講：「伊著妖，在起痟。你人按怎卜聽伊兮話？」
但是抑有人講：「這毋是著妖兮人講兮話！魔鬼敢會付青盲兮有看見？」
耶穌負猶太人棄絕
在耶路撒冷有舉行奉獻聖殿兮典禮；彼個時是冬天。
耶穌佇聖殿裡所羅門兮走廊在行來行去。
猶太人就給耶穌圍咧，講：「你卜卻付我人推測若久？你若是彌賽亞，就坦白給我人講。」
耶穌應講：「我已經有給你人講啊，但是你人毋信。我奉我兮天父兮權所做兮載誌，來在給我做證。
但是你人毋信，因為你人毋是我兮羊。
我兮羊聽我兮聲；我別伊人，伊人抑來隨我。
我賞賜伊人永遠兮性命；伊人永遠毋會死亡；因為無人會當對我兮手給伊人搶去。
賞賜許兮羊仔付我此位天父，比一切較偉大；無人會當對天父兮手給伊人搶去。
我合天父是一體兮。」
猶太人又卻摭石頭起來卜給伊抌。
耶穌給伊人講：「我已經有做真濟天父付我做兮好事付你人看啊。你人是為著我所做兮哪一項載誌，卜用石頭抌我？」
猶太人應伊講：「我人用石頭卜給你抌，毋是因為你做好事，是因為你講褻瀆兮話！你不過是一個人，但是自稱你是上主。」
耶穌應講：「你人兮律法敢毋是有寫講：『我講你人是神』？
聖經所記載兮話永遠是真理；既然上主稱呼許兮得著上主兮話兮人做神，
若按爾，天父揀選我，差派我來此個世間，按怎我講『我是上主兮囝，』你人就指責我講『你講褻瀆兮話』？
我若毋是在做我兮天父兮工作，你人就毋免信我，
但是我若是在做天父兮工作，你人若毋信我兮話，至少抑著信我所做兮。按爾你人就會確實知影天父佇我兮裡面，我抑佇天父兮裡面。」
伊人又卻想卜掠伊；但是伊就逃出伊人兮手。
耶穌又卻過去約旦河兮對岸，去格約翰較早在給人洗禮兮所在，就滯許。
有真濟人來見耶穌。伊人講：「約翰雖然無做神蹟；但是關係此個人，約翰所講兮載誌攏有影。」
佇許就有真濟人信耶穌。
本著作係採用創用 CC 姓名標示-相同方式分享 3.0 台灣 授權條款授權.
